काठमाडौं । राष्ट्रियसभाका अध्यक्ष गणेशप्रसाद तिमिल्सिनाले सरकार र संसद् बीच समन्वय र सहकार्यबाट अगाडि बढ्नुपर्ने बताउनुभएको छ । १६औँ सङ्घीय संसद् दिवसका अवसरमा सङ्घीय संसद् सचिवालयले आज सिंहदरबारमा आयोजना गरेको कार्यक्रमलाई सम्बोधन गर्दै उहाँले सरकार र संसद् बीचमा समन्वय आवश्यक छ भन्नुभयो ।
“सरकार र संसद् समन्वय र सहकार्यबाट अगाडि बढ्ने हो । एकले अर्काका कुराहरु बुझ्ने बुझाउनुपर्ने हुन्छ”, उहाँले भन्नुभयो, “भावी नेतृत्वसँग छलफल, सहकार्य गरेर संसद् सेवामा देखिएका समस्या सुधार गरेर अगाडि बढ्छौँ ।” अध्यक्ष तिमिल्सिनाले प्रतिनिधिसभा र प्रदेशसभा सदस्यको निर्वाचन भर्खरै सम्पन्न भएको र आम जनताले राखेको आकाङ्क्षा पूरा गर्न सबै पक्ष दत्तचित्त भएर लाग्नुपर्ने बताउनुभयो ।
“संसद् अधिवेशनलाई छिटोछरितो र प्रभावकारी बनाउन तथा समितिलाई चुस्तदुरुस्त ढङ्गले चलाउनुपर्छ”, उहाँले भन्नुभयो, “कतिपय पुराना सांसद निर्वाचित हुनुभएको छ । कतिपयमा नयाँ ऊर्जा छ तर सिक्नुपर्ने अवस्था पनि छ, संसद्लाई प्रभावकारी बनाउन संसद् सेवाका कर्मचारीको भूमिका महत्वपूर्ण छ ।”
संसद् सेवालाई प्रभावकारी बनाउन सबै पक्ष हरदम रुपमा लाग्नुपर्ने उहाँको भनाइ थियो । “संसद् सेवाको स्वायत्ततालाई कसरी अझ प्रभावकारी बनाउने, यसको प्रभाकारितालाई जनमुखी बनाउने यी विषय सम्बोधन गर्न हामी लाग्नेछौँ”, उहाँले भन्नुभयो ।
संघीय संसद सचिवालयका महासचिव भरतराज गौतमले संसद् सेवालाई प्रभावकारी र जनमुखी बनाउन मातहतका कर्मचारीलाई निर्देशन दिनुभयो । कानुन, न्याय तथा संसदीय मामिला मन्त्रालयका सचिव उदयराज सापकोटाले संसद् र समितिका कामकारबाहीलाई प्रभावकारी बनाउन सबैको क्रियाशीलता आवश्यक रहेको बताउनुभयो ।
सो अवसरमा उत्कृष्ट सेवा गर्ने संसद् सचिवालयका कर्मचारीलाई पुरस्कृत गरिएको थियो । एक लाख राशिको ‘सर्वोत्कृष्ट संसद् सेवा पुरस्कार’ सचिवालयका उपसचिव सृजना बराल,७५ हजार राशिको ‘उत्कृष्ट संसद् सेवा पुरस्कार’ शाखा अधिकृत बाबुराम बस्याल तथा जनही ५० हजार राशिको ‘संसद् सेवा पुरस्कार’ माली चन्द्रबहादुर नगरकोटी र खरिदार चन्द्रप्रसाद ढुङ्गानालाई प्रदान गरिएको थियो ।
यस्तै कार्यक्षमता मूल्याङ्कनमा उत्कृष्ट हुने कार्यालय सहयोगी सीता जिसी र रमेशराज गिरी, हलुका सवारी चालक मोहनकृष्ण नेपाली, माली हरिप्रसाद अधिकारी र कुचिकार विजय नेपालीलाई जनही पाँच÷पाँच हजारले पुरस्कृत गरिएको थियो । सो अवसरमा अध्यक्ष तिमिल्सिनाले सचिवालयले प्रकाशन गरेको ‘सङ्घीय संसद् सेवा’ स्मारिका विमोचन गर्नुभएको थियो ।
कार्यक्रममा २५ वर्ष अविछिन्न सेवा गरेका कर्मचारीलाई दीर्घ सेवा पदक प्रदान गरिएको थियो । सो अवसरमा दिवसका अवसर पारेर आयोजित विभिन्न खेलकुद प्रतियोगिताका विजेतालाई प्रमाणपत्र र ट्रफी प्रदान गरिएको थियो । संसद् सेवा दिवसका अवसर पारेर रक्तदान, हाजिरीजवाफ, चेस, फुटबल र कविता प्रतियोगिता गरिएको थियो ।
