लन्डन । गैर आवासीय नेपाली संघ बेलायतको अध्यक्ष पदमा उम्मेदवारी घोषणा गरेका वर्तमान उपाध्यक्ष सुनिलबाबु खड्काले अर्का उम्मेदवार प्रेम गाहा मगरलाई समर्थन जनाउँदै आफूले उपाध्यक्ष पदमा उम्मेदवारी घोषणा गर्नुभएको छ ।
उपाध्यक्ष खड्काले गाहामगर आफूभन्दा अनुभवी र वरिष्ठ भएकाले अध्यक्ष आफ्नो समर्थन रहेको बताउनुभएको हो । आइतबार राति एक वक्तव्य जारी गर्दै खड्काले अब आफूले पुनः उपाध्यक्ष पदमा नै उम्मेदवारी दिने घोषणा गर्नुभएको छ ।
‘नेपाली समाजको एकताका लागि गैर आवासीय नेपाली संघ यूकेको निर्वाचनलाई मित्रवत र स्वभाविक बनाउने उद्देश्यले संघमा मैले भन्दा पहिलेदेखि कार्य गर्दै आउनु भएका संघमा मभन्दा वरिष्ठ वर्तमान उपाध्यक्ष तथा वर्ष २०२१–२०२३ का लागि अध्यक्ष पदका उम्मेदवार श्री प्रेम गाहा मगरको उम्मेदवारीलाई पूर्ण समर्थन गर्दै मैले अध्यक्ष पदमा उम्मेदवारी नदिने निर्णय गरेको छु ।’ वक्तव्यमा उहाँले भन्नुभएको छ, ‘अध्यक्ष पदमा प्रेम गाहा मगरको समर्थन गर्दै संघमा सकारात्मक परिवर्तन ल्याउने तथा समाज सेवामा निरन्तर क्रियाशील हुने उद्देश्यले पुनः उपाध्यक्ष पदमा नै उम्मेदवारी दिने घोषणा गर्दछु ।’
एनआरएनए अभियन्ता शेर सुनारको सक्रियतामा भएको बैठकमा खड्काले अध्यक्ष पदमा उम्मेदवारी नदिई आगामी नेतृत्वका लागि प्रेम गाहा मगरलाई समर्थन गर्दै आफू पुनः एक कार्यकाल गाहा मगरको नेतृत्वमा नै उपाध्यक्ष पदमा बस्न सहमति जनाउनुभएको छ । अध्यक्ष पदका अन्य आकांक्षीहरुबीच पनि सहमतिको प्रयास जारी रहेको सुनारले बताउनुभएको छ ।
एनआरएन यूकेको आगामी कार्यकाल(२०२१–२०२३) का लागि खड्कासहित चार जनाले उम्मेदवारी घोषणा गर्नुभएको थियो । खड्काले गाहा मगरलाई समर्थन जनाएसँगै अब एनआरएनए युकेको अध्यक्ष पदमा आकांक्षीको संख्या तीन भएको छ । अध्यक्षका लागि उपाध्यक्षहरु प्रेम गाहा मगर र रोजिना प्रधान तथा दीपक श्रेष्ठ प्रतिस्पर्धामा रहनुभएको छ ।
एनआरएन यूकेको वर्तमान कार्यसमितिमा ६ जना उपाध्यक्ष छन् । ती मध्ये पाँच जना एक ठाउँमा उभिएका छन् । प्रेम गाहा मगर, सुनिलबाबु खड्का, नारायण कँडेल, रामचन्द्र पोखरेल र मोहन कार्की एक ठाउँमा रहनुभएको छ भने महिला उपाध्यक्ष रोजिना प्रधान एक्लै प्रतिस्पर्धामा हुनुहुन्छ ।
गाहा मगरलाई समर्थन जनाएका खड्काले पदका लागि तँछाड मछाड गर्ने प्रवृत्ति मौलाएको भन्दै त्यसले बेलायतको नेपाली समाजलाई हित नगर्ने पनि स्पष्ट पार्नुभएको छ । उहाँले सर्वसम्मत रुपमा नेतृत्व छनौट गर्न पनि आग्रह गर्नुभएको छ ।
उपाध्यक्ष सुनीलबाबु खड्काको वक्तव्य
आदरणीय बाबाआमा दाजुभाई दिदीबहिनीहरु
गैर आवासीय नेपाली संघ यूकेको निर्वाचन(३१जुलाई २०२१) का सन्दर्भमा मैले अध्यक्ष पदमा उम्मेदवारी घोषणा गरेको कुरा सर्वविदितै छ ।
संघको उपाध्यक्षको रुपमा (२०१९–२०२१) दुई वर्ष सफलतापूर्वक कार्य गरिसकेको अवस्थामा मेरो उम्मेदवारी स्वभाविकै हो । तर पनि संघमा विगतको असहज निर्वाचनलाई लिएर बेलायतको नेपाली समाजमा आएको विभाजनलाई मध्य नजर गर्दै सर्वसम्मत नेतृत्व छनौटका लागि प्रयास गरिएको थियो । मेलमिलापको प्रयास स्वरुप निर्वाचनमा उम्मेदवार हुने घोषणा गरेका सबै उम्मेदवारहरुलाई मिलेर आउनसमेत मैले अनुरोध गरेको थिएँ ।
तर, दुर्भाग्य यस बेलायतको नेपाली समाज तथा गैर आवासीय नेपाली संघ यूकेमा एकता तथा मेलमिलाप हुनपर्ने आवश्यकतालाई नजर अन्दाज गर्दै केबल पदका लागि तछाडमछाड गर्ने प्रवृत्तिले समाजमा थप नकारात्मक प्रभाव पर्ने निश्चित छ ।
अतः नेपाली समाजको एकताका लागि गैर आवासीय नेपाली संघ यूकेको निर्वाचनलाई मित्रवत र स्वभाविक बनाउने उद्देश्यले संघमा मैले भन्दा पहिलेदेखि कार्य गर्दै आउनु भएका संघमा म भन्दा वरिष्ठ वर्तमान उपाध्यक्ष तथा वर्ष २०२१–२०२३ का लागि अध्यक्ष पदका उम्मेदवार श्री प्रेम गाहा मगरको उम्मेदवारीलाई पूर्ण समर्थन गर्दै मैले अध्यक्ष पदमा उम्मेदवारी नदिने निर्णय गरेको छु । धन्यवाद
सुनीलबाबु खड्का
उपाध्यक्ष
३० मे २०२१