शंखरापुर नगरपालिका प्रमुखलाई बुझायो माओवादी केन्द्रले २९ बुँदै ध्यानाकर्षणपत्र

राज्य-राजनीति

गृहपृष्ठ
राज्य-राजनीति

शंखरापुर नगरपालिका प्रमुखलाई बुझायो माओवादी केन्द्रले २९ बुँदै ध्यानाकर्षणपत्र

ग्लोबल संवाददाता शुक्रबार, असार ८, २०८०

काठमाडौं । नेपाल कम्युनिस्ट पार्टी (माओवादी केन्द्र) शंखरापुर नगर समिति साँखुले शंखरापुर नगरपालिकालाई ध्यानाकर्षण गराएको छ ।

बिहीबार नगर प्रमुख रमेश नापितलाई केन्द्रका नगर अध्यक्ष रक्षेबहादुर तामाङ “युनिक”ले २९ बुँदे ध्यानाकर्षणपत्र बुझाउनुभएको हो । ध्यानाकर्षणपत्रमा आर्थिक वर्ष २०८०।८१ को नीति कार्यक्रम र बजेटमा शंखरापुरलाई समृद्धतर्फ उन्मुख गराउन जनमुखी र जनपक्षीय अनि उत्पादनमुखी योजना तथा बजेट विनियोजन गर्नुपर्ने मागहरू अघि सारिएको छ । त्यस्तै पत्रमा लेखिएको छ‚ ‘सङ्घीय लोकतान्त्रिक गणतन्त्रात्मक नेपालको संविधानको मर्म र भावनाको यस नगरपालिकामा अक्षरशः पालना नभएको पाइएकोले कार्यालयमा देशको राष्ट्रपति र प्रधानमन्त्रीको तस्बिर नराखिनुले संविधान उल्लंघन र बर्खिलाप भएकोप्रति गम्भीर ध्यानाकर्षण भएको छ । तत्काल राख्नुहुन अनुरोध गर्दछौँ । साथै नगरपालिकाको वार्षिक योजना पुस्तिकाको कभर पेजमा प्रकाशन गरिएको राजा महाराजाको तस्बिर हटाईयोस् ।’

यस्तै शंखरापुर नगरपालिका वडा नं. ३, साबिक लप्सेफेदी गा.वि.स. वडा नं. ४, ५, ६ र ९ का किसान जोताहाहरूलाई सम्बोधन गर्न आनन्द शम्सेर जबराको बिर्ता जग्गामध्ये ५०४ रोपनी जग्गा प्राप्त गराउन हामी सफल भएका छौँ । अब किसानले प्राप्त गर्न बाँकी रहेको २०३७ साल पौष २६ गते भएको मिलापत्र बमोजिम जग्गाहरू किसानको जग्गा किसानलाई फिर्ता गर्नु पहल गर्न आग्रह गरिएको छ । यसैगरी नगरप्रमुख नापितले ध्यानाकर्षण पत्रमा उल्लेख भएबमोजिमका मागहरू सकिने जतिमा कुनै कसरत बाँकी नराखी सम्बोधन गरिने आश्वासन दिनुभएको थियो ।