काठमाडौं । नुवाकोट ककनी गाउँपालिकाका अध्यक्ष एवं नेकपा माओवादी केन्द्रका नेता सुमन तामाङले फोहोरमैला व्यवस्थापनमा सहरी विकास मन्त्रालय र मन्त्रीको तदारुकता नदेखिएको भन्दै आक्रोश पोख्नुभएको छ ।
काठमाडौं उपत्यकाबाट नुवाकोटको बन्चरेडाँडामा जाने फोहरबाट ककनी, धुनीबेंसी र आसपासका पालिकाहरुमा भएको गम्भीर प्रकृतिको प्रभाव र त्यसको अल्पकालीन र दिर्घकालीन समस्या समाधानका विषयमा सहरी विकासमन्त्री सीता गुरुङको अध्यक्षतामा मंगलबार सिंहदरबारमा बसेको बैठकमा अध्यक्ष तामाङ पूर्ववत् निर्णय कार्यान्वयन नगरिएको भन्दै आलोचना र आक्रोश व्यक्त गर्नुभएको हो । 'बैठकबाट बैठकले वाक्कदिक्क भइसक्यौं । प्रधानमन्त्रीज्यूको नेतृत्वमा बसेको बैठकको तीन दिनभित्र कार्यान्वयन गरिसक्नु पर्ने निर्णय पनि अहिलेसम्म कार्यान्वयन भा'छैन । प्रधानमन्त्रीज्यूले नै भन्नुभएपछि त्यो कुरा हल हुनु पर्ला नि ! त्यो नभएको किन ? हाम्रै सुस्तता र कमजोही हो कि ? त्यो स्पष्ट पारिदिनुस्,' अध्यक्ष तामाङले भन्नुभयो, 'त्यसको जवाफदेही स्थानीय तह हुनुपर्छ भने पनि तपाईंहरुले झुन्डिन पर्छ भन्नुभयो भने हामी तयार छौं । गोली खाना पर्छ भन्यो भने पनि तयार छौं । भनिएका कुराहरु गरिनु पर्यो ।'
आक्रामक शैलीमा भनाइ राख्नुभएका अध्यक्ष तामाङले फोहोरमैला प्रभावित क्षेत्र ककनी र धुनीबेंसीका जनताले स्वच्छ वातावरणमा बाँच्न पाउने मौलिक हक समेत गुमाउनुपरेको उल्लेख गर्नुभयो । उहाँले बैठक गर्न, निर्णय गर्ने हो भने बैठकको औचित्य नरहने भन्नुहुँदै ककनी र धुनीबेंसीका मान्छेलाई मार्न नपाइने स्मरण गराउनुभयो ।
'हामी स्थानीय तहको नेतृत्वमा आइसकेपछि तीन जना मन्त्रीज्यूहरु फेरिसक्नुभयो । तीन मन्त्रीजयूहरुकै अहिलेसम्मको क्रियाकलाप बैठकबाट बैठक बैठकबाट बैठकभन्दा केही भा छैन । निर्णय कार्यान्वयन नगर्ने हो भने यस्ता बैठक जरुरी छैन,' अध्यक्ष तामाङले भन्नुभयो, 'ककनी र धुनीबेंसीका मान्छेलाई अब मार्न पाइँदैन । कि त तपाईंहरुले नै व्यवस्थापन गर्नुहोस् भन्ने दुवै स्थानीय तहलाई अधिकार दिनोस् । त्यसमा फोहोर पुर्नेलगायत अरु सबै व्यवस्थापनका कुरा हामी आफ्नै नागरिकलाई साक्षी राखेर गर्न तयार छौं ।'
'फोहोर मैला उत्पादन गर्ने निकायले आफ्नै स्थानीय तहमा व्यवस्थापन गर्नुपर्छ भनेर २०६८ को ऐनले बकैदा लेखेको छ । त्योअनुरुप व्यवस्थापन गर्न अनुरोध गरेँ । विकल्प छैन भनेदेखिन् । फोहोर र मान्छे सँगै राख्न हुँदैन । तत्काल व्यवस्थापन गर्नुपर्यो । ककनी र धुनीबेंसीलाई फोहोर चाहिँदैन ।'
वाग्मती प्रदेशसभा सांसद रमेशकुमार महतले बैठकले तत्काल र दिर्घकालीन योजना तयार गरी फोहर व्यवस्थापन गर्न आवश्यक कार्यविधि तयार गरी कार्य अगाडि बढाउने निर्णय गरेको जानकारी गराउनुभयो । 'काठमाडौं उपत्यकाबाट नुवाकोटको बन्चरेडाँडामा जाने फोहरबाट ककनी, धुनिबेंसी र आसपासका पालिकाहरुमा भएको गम्भीर प्रकृतिको प्रभाव र त्यसको अल्पकालीन र दिर्घकालीन समस्या समाधानको लागि प्रभावित क्षेत्रका सांसद र जनप्रतिनिधि र सहरी विकास मन्त्रालयका मन्त्रीज्यूको अध्यक्षतामा बैठक बस्यो । बैठकले तत्काल र दिर्घकालीन योजना तयार गरी फोहर व्यवस्थापन गर्न आवश्यक कार्यविधि तयार गरी कार्य अगाडि बढाउने निर्णय गरेको छ,' महतले भन्नुभयो ।
बैठकमा प्रभावित क्षेत्रका सांसद र जनप्रतिनिधिलगायतको उपस्थिति थियो ।
