स्वायत्त ताम्सालिङ प्रदेश नपाएसम्म हामी लडाइँ लड्छौं, साथ दिनुहोस् : अध्यक्ष डा. योञ्जन

राज्य-राजनीति

गृहपृष्ठ
राज्य-राजनीति

स्वायत्त ताम्सालिङ प्रदेश नपाएसम्म हामी लडाइँ लड्छौं, साथ दिनुहोस् : अध्यक्ष डा. योञ्जन

ग्लोबल संवाददाता आइतबार, भदौ १०, २०८०

काठमाडौं । ताम्सालिङ संघर्ष समिति नेपालका अध्यक्ष एवं पूर्वराजदूत डा गणेश योञ्जनले स्वायत्त ताम्सालिङ प्रदेश नपाएसम्म लडाइँ लड्ने उद्घोष गर्नुभएको छ ।

काठमाडौंको धुम्बाराहीस्थित एक पार्टी प्यालेमा आइतबार 'ताम्सालिङ संघर्ष समिति नेपाल' घोषणा समारोहलाई सम्बोधन गर्नुहुँदै डा योञ्जनले उद्देश्य प्राप्त नभएसम्म लड्ने प्रतिबद्धता जनाउनुभएको हो ।

'संघर्ष समिति घोषणा गरेको तामाङ राष्ट्रका लागि, राष्ट्रिय मुक्तिका लागि हो । यो कतै सेलाउने हो कि । कतै लडखडिने पो हो कि भन्ने भ्रमबाट मुक्त भएर उद्देश्य प्राप्तका लागि यहाँहरुको सहयोग, यहाँहरुको ऐक्यबद्धता आएको छ । अन्तिम घडीसम्म हामी लड्छौं । त्यो लडाइँमा यहाँहरुको सहभागिता हुनेछ अपेक्षा संघर्षण समितिले राखेको छ,' उहाँले भन्नुभयो ।

उहाँले संघर्ष समिति कुनै पार्टीको विरुद्ध र पार्टीको नीतिअनुसार नचल्ने भएकोले पार्टीभन्दा माथि उठेर बुझ्न र आन्दोलनमा सरिक हुने सरोकारवाला सबैलाई आह्वान गर्नुभयो । नेपाल आदिवासी जनजाति महासंघका अध्यक्ष गेल्जे शेर्पाले निर्णायक आन्दोलन गर्न हो भने महासंघले सहयोग गर्न तयार रहेको बताउनुभयो ।

उहाँले प्रदेश १ को आन्दोलनबाट पनि ताम्सालिङ संघर्ष समितिले सिक्नु पर्ने कुरा रहेको उल्लेख गर्नुभयो । '१ नम्बर प्रदेशमा आन्दोलन कसरी सफलतान्मूख छ । त्यो विषयमा जनजाति महासंघसहित त्यहाँको संघर्ष समितिसँग बसौं । त्यसको मूलमन्त्र हामी दिन्छौं,' अध्यक्ष शेर्पाले भन्नुभयो,' तथ्यांकमा १८ लाख देखाए पनि झन्डै २० लाख तामाङ काठमाडौं वरिपरि राम्रो भूगोलमा बसेका छन् । तर अधिकार पाएनन् । अब ताम्सालिङका लागि मुठी कसेर लाग्नुस् । म सहयोग गर्न तयार छु ।'

प्रकाशित मिति: आइतबार, भदौ १०, २०८० २१:४५

प्रतिक्रिया दिनुहोस्