बागमती प्रदेशसभाको दोस्रो बैठक : नेवारी र तामाङ भाषाको विधेयकमाथि सैद्धान्तिक छलफल

राज्य-राजनीति

गृहपृष्ठ
राज्य-राजनीति

बागमती प्रदेशसभाको दोस्रो बैठक : नेवारी र तामाङ भाषाको विधेयकमाथि सैद्धान्तिक छलफल

ग्लोबल संवाददाता आइतबार, असोज १४, २०८०

मकवानपुर । बागमती प्रदेशसभाको आज बसेको दोस्रो बैठकमा संस्कृति, पर्यटन तथा सहकारीमन्त्री पुकार महर्जनले टेबुल गर्नुभएको प्रदेश सरकारी कामकाजको भाषा सम्बन्धमा व्यवस्था गर्न बनेको विधयेकमाथि सैद्धान्तिक छलफल भयो । उक्त विधेयकअन्तर्गत नेवारी र तामाङ भाषाको सम्बन्धमा सैद्धान्तिक पक्षमा मात्रै छलफल गरिएको थियो । छलफलमा एकीकृत समाजवादीका तर्फबाट प्रदेशसभा सदस्य रमा आले मगरले सरकारद्वारा प्रस्तुत गरिएको विधेयकमा नेवारी र तामाङ भाषालाई सरकारले आफ्नो कामकाजको भाषा बनाउनु प्रशंसनीय भएको तर, प्रदेशको अन्य जिल्लामा रहेका सुनुवार, जिरेल र मगर भाषाका साथै कला संस्कृतिलाई पनि उत्थान गर्न सरकारले आगामी आर्थिक वर्षमा गृहकार्य थलनी गर्न आग्रह गर्नुभयो । नेपाल मजदुर किसान पार्टीका सुरेन्द्रराज गोरसाईं र सृजना सैँजूले भाषिक सांस्कृतिक कलाहरूलाई पनि समेट्ने खालको विधेयकमा समावेश गर्न सुझाव दिँदै नेवारी परम्पराअनुसारको जात्रा पर्वलाई सम्पदा सूचीमा संरक्षण गर्नेतर्फ पनि प्रदेश सरकारको दीर्घकालीन रूपमा प्रभाव पार्ने कार्यलाई तीव्रता दिनुपर्दछ भन्नुभयो । नेकपा एमालेका प्रमुख सचेतक मधुसुदन प्रसाद पौडेलले भाषिक विकासका लागि प्रदेश सरकारले दलगत स्वार्थभन्दा माथि उठेर अगाडि बढ्नुपर्ने भन्दै नेवारी र तामाङलाई मात्रै नभई प्रदेशका सबै जिल्लामा रहने समुदायका मातृभाषालाई पनि प्रदेश सरकारले उत्थान गर्न प्रभावकारी ऐन बनाउनुपर्ने माग गर्नुभयो । अर्का प्रदेशसभा सदस्य वसन्त मानन्धरले प्रदेश सरकारले दोस्रो कार्यकालको अवधिमा प्रदेशभित्र बोलिने मातृभाषाबाहेक नेवारी र तामाङ भाषालाई सरकारी कामकाजका लागि ल्याएको विधेयक सकरात्मक रहेको उल्लेख गर्दै प्रदेशमा रहेका अन्य जाति समुदायको भाषा, धर्म, संस्कृतिलाई पनि क्रमशः प्राथमिकतामा राखेर अघि बढ्नुपर्ने खाँचो रहेको बताउनुभयो । संस्कृति, पर्यटन तथा सहकारीमन्त्री महर्जनले सरकारले संसद्मा ल्याएको भाषिक विधेयकमाथि भएको सैद्धान्तिक छलफलका क्रममा सांसदहरूले उठाउनुभएको प्रश्नको जवाफ दिँदै सङ्घीयताको आधार स्वरूप प्रदेश सरकारले दीर्घकालीन भाषिक विकासका लागि पहिलो चरणमा नेवारी र तामाङ भाषालाई प्राथमिकता दिएर कार्यान्वयमा ल्याउन लागिएको उल्लेख गर्नुभयो । उहाँले प्रदेशको विभिन्न जिल्लामा रहनुभएका आदिवासी जनजाति दलितहरूको पनि मातृभाषासहितको भाषिक विकासका लागि क्रमशः विधेयकहरू प्रस्तुत गर्दै लैजाने सरकारको नीति रहेको बताउनुभयो । प्रदेशसभाको अर्को बैठक यही असोज १५ गते अपराह्न २ बजे बस्नेछ ।

प्रकाशित मिति: आइतबार, असोज १४, २०८० २१:५२

प्रतिक्रिया दिनुहोस्