नुवाकोट । काठमाडौंबाट नुवाकोट प्रवेश गर्ने छोटो दुरीको रुपमा रहेको टोखा-छहरे सडकखण्डको दुरावस्थाबारे वर्षौंदेखि चर्चा चलिरहेको छ । विगतका वर्षहरुमा काठमाडौंको टोखा र तारकेश्वर नगरपालिकामा पर्ने झोर महांकालको बाटो नबन्दा संसद्मा समेत पटक-पटक आवाज सुनिन्थ्यो । सामाजिक सञ्जालमा जनप्रतिधिविरुद्ध 'रिप' (श्रद्धाञ्जली) लेखेर विरोध गरेको र उक्त बाटो भएर आवतजावत गर्नसमेत असुरक्षा महसुस भएको गुनासो नुवाकोट १ बाट प्रतिनिधिसभामा निर्वाचित हितबहादुर तामाङले सदनमा उठाउनुभएको थियो ।
हरेक वर्षको दसैं-तिहारजस्ता चाडहरु नजिक आउँदा झोरको बाटोबारे 'निकै राजनीति' हुने गर्थ्यो, कहिले कांग्रेस, कहिले माओवादी त, कहिले एमाले लगायत दलका नेता, कार्यकर्ताहरुबाट । तर गत वर्षको अन्त्यसम्ममा झोर क्षेत्रका सडक कतै पक्की, कतै नर्मल पीच भएपछि चुपचाप देखिएका छन् सरोकारवाला । त्यस खण्डमात्रै होइन, काठमाडौंको सीमा गुर्जेभन्ज्याङदेखि छहरे क्षेत्रमा पनि सडक निर्माणले तीव्रता पाएको छ ।
पछिल्ला निर्वाचनबाट स्थानीय सरकार र जनप्रतिनिधिहरु आएपछि विकास भएन, काम भएन भनिए पनि समग्रमा मूल्यांकन गर्ने हो भने विकासका काम अघि बढेको स्थानीय भुक्तभोगीहरु बताउँछन् । भलै सोचेजति र चाहेजति नभएका होलान् । स्थानीय सरकारले आफ्नो क्षेत्रमा सडक पूर्वाधार निर्माणदेखि शिक्षा, स्वास्थ्य, कृषि लगायत क्षेत्रमा विकासलाई अघि बढाइरहेका छन् । अचेल गुर्चे-छहरे खण्डमा पनि ठाउँ ठाउँमा ढलान र सामान्य पीच, ग्राभेल, सोलिङ लगायत काम भइरहेका छन् ।
पछिल्ला वर्षमा मात्रै सांसदको सिफारिसमा १० करोड, केन्द्रीय बजेटबाट ६ करोड र प्रदेशबाट २ करोड चानचुन् बजेट उक्त सडक निर्माणमा छुट्याइएको थियो । जुन रकमबाट सडक निर्माण चलिनैरहेको छ । माओवादी केन्द्र शिवपुरीका अध्यक्ष वीरबहादुर तामाङले टोखा-छहरेको २८ किलोमिटर सडक खण्डका शिवपुरी ७ र ८ को गुरुङगाउँ, चाँपाबोट क्षेत्र आसपास, बोरेखोला मुहान, पाँगाको दोबाटो नजिक, थानापति आसपास क्षेत्रहरुमा काम भइरहेको बताउनुभयो ।
झन्डै आधार दर्जन निर्माण कम्पनीले उक्त क्षेत्रमा खण्ड, खण्डको निर्माण जिम्मा लिएका छन् । कतिपय ठेकेदारले कम गुणस्तरका सामग्री हालेर निर्माण गरिएको भन्दै स्थानीय र दलीय प्रतिनिधिले बेला-बेला आवाज उठाउँदै आएको पाइन्छ । अध्यक्ष तामाङले बजेट बढाउन सकेमा एकाध वर्षमा गुर्जे-छहर सडकको काँचुली फेर्ने आशा व्यक्त गर्नु भयो ।
नुवाकोट सदरमुकाम विदुर, रसुवाको धुन्चे र धादिङ जान समेत छोटो मार्गलाई सहज बनाउनमा स्थानीय र जनप्रतिनिधिको जोड रहेको उहाँको भनाइ छ ।
झोर महांकालको तस्बिर
