पर्यटनमन्त्री तामाङद्वारा भक्तराज आचार्यप्रति श्रद्धाञ्जली र परिवारमा समवेदना प्रकट

समसामयिक-समाचार

गृहपृष्ठ
समसामयिक-समाचार

पर्यटनमन्त्री तामाङद्वारा भक्तराज आचार्यप्रति श्रद्धाञ्जली र परिवारमा समवेदना प्रकट

ग्लोबल संवाददाता शनिबार, फागुन २६, २०८०

काठमाडौँ । नवनियुक्त संस्कृति, पर्यटन तथा नागरिक उड्ड्यनमन्त्री हितबहादुर तामाङले भजनशिरोमणि गायक, संगीतकार भक्तराज आचार्यप्रति श्रद्धाञ्जली र परिवारजनमा समवेदना प्रकट गर्नुभएको छ । मन्त्री तामाङले शनिबार बुद्धनगरस्थित आचार्य निवास पुगेर दिवंगत आचार्यप्रति श्रद्धाञ्जली तथा परिवारमा समवेदना प्रकट गरेको उहाँको सचिवालयले जनाएको छ । सचिवालयका रुपक तामाङले भजनशिरोमणि भक्तराज आचार्यप्रति श्रद्धाञ्जली तथा परिवारमा समवेदनाका लागि मन्त्री तामाङ उहाँको निवास पुगेको जानकारी गराउनुभयो । मन्त्री तामाङले भजनशिरोमणि भक्तराज आचार्यको तस्बिरमा पुष्प चढाउनुभएको थियो ।

भक्तराजको ८२ वर्षको उमेरमा फागुन १४ गते सोमबार निधन भएको थियो । घरमै बसेका बेला एक्कासी अक्सिजनको लेभल घटेपछि अस्पताल लैजाने क्रममा आचार्यको निधन भएको थियो । २०४६ साल मंसिर १९ गतेको एउटा दुर्घटनापछि आचार्यको स्वर र सुर हराएको थियो । उहाँले करिब ४ सयजति गीत, गजल, भजन, राष्ट्रिय गीत र बालगीत गाउनुभएको थियो । आचार्यका श्रीमती, दुई छोरा-बुहारी र दुई नाति हुनुहुन्छ ।

तामाङ गत सोमबार फागुन २१ मा मन्त्रीमा नियुक्त हुनुभएको हो । बिनाविभागीय मन्त्रीका रुपमा शपथ लिनुभएका तामाङले बुधबार संस्कृति, पर्यटन तथा नागरिक उड्ड्यन मन्त्रालयको पदभार ग्रहण गर्नुभएको हो । उहाँ २०६८ सालमा छोटो अवधि युवा तथा खेलकुदमन्त्री बन्नुभएको थियो । तामाङ २०७४ र ०७९ मा नुवाकोट क्षेत्र नम्बर १ बाट प्रत्यक्ष निर्वाचित सांसद हुनुहुन्छ ।

प्रकाशित मिति: शनिबार, फागुन २६, २०८० २१:४७

प्रतिक्रिया दिनुहोस्