घलेभञ्ज्याङ । नुवाकोट जिल्लाको पञ्चकन्या गाउँपालिकामा करिब साढे २ वर्षदेखि कार्यसमिति दातृ संस्थाका प्रतिनिधिहरुलाई गाउँपालिकामा भव्य स्वागत गरिएको छ ।
स्वास्थ्य, पूर्वाधारलगायत क्षेत्रमा सहयोग पुर्याउँदै आएको माल्टेजर इन्टरनेश्नलका जर्मनी प्रतिनिधिलाई मंगलबार घलेभञ्ज्याङमा पञ्चेबाजासहित फूलमाला र खादा लगायतले सम्मान तथा स्वागत गरिएको हो । दाताहरुको स्वागतमा गाउँपालिका अध्यक्ष तेजबहादुर तामाङ, उपाध्यक्ष सीता खड्का, प्रमुख प्रशासकीय अधिकृत अशोक विष्ट, शाखा अधिकृतहरु मंगलबहादुर विष्ट, उद्धवराज पाण्डे, हेमनारायण महतो लगायत विभिन्न शाखा प्रमुख र कर्मचारीहरुले स्वागत गर्नुभएको थियो ।


माल्टेजर इन्टरनेसनलको सहयोग रकम पञ्चकन्या गाउँपालिको सहकार्यमा कार्यरत ग्रामीण स्वावलम्बन विकास केन्द्र र राष्ट्रिय मानसिक स्वास्थ्य सङ्गठन (कोसिस) ले पञ्चकन्या गाउँपालिकाका वडाहरुमा विभिन्न कार्यक्रममा खर्च गर्दै आएका छन् । अनुगमनका क्रममा पञ्चकन्या पुगेका ती प्रतिनिधिहरुका साथमा RSDC आबद्ध व्यक्तहरु पनि सहभागी भएको पञ्चकन्या गाउँपालिका पशुसेवा शाखा प्रमुखसमेत रहनुभएका पाण्डेले जानकारी गराउनुभयो ।
उहाँका अनुसार ती संस्थाको सहयोगमा वडा नं १ मा २५० घर पुनर्निर्माण, ४ सयभन्दा बढी नागरिकलाई मनोपरामर्श र उपचार, स्वास्थ्यकर्मीलाई तालिम, कोरोना भाइरस महामारीविरुद्ध लड्न तयार आइसोलेसन केन्द्रहरुमा बेड, अक्सिजन कन्सन्ट्रेटर सहयोग, वडा नम्बर १ मा हेल्थ पोस्ट भवन निर्माण लगायत कार्य गरिएको छ ।





