सिन्धुली । ‘राष्ट्रपति रनिङ शिल्ड प्रतियोगिता तथा प्रथम सिन्धुली जिल्लास्तरीय खेलकुद महोत्सव–२०८१’ कमलामाई नगरपालिका प्रथम भएको छ । आज सम्पन्न महोत्सवमा तीनपाटन गाउँपालिका दोस्रो तथा हरिहरपुरगढी गाउँपालिका तेस्रो भएको छ ।
कमलामाई नगरले सबै विधाका प्रतिस्पर्धामा ३० स्वर्ण, १२ रजत र ४ कास्यसहित कूल ४६ पदक हात पार्दै प्रथम स्थान ओगटेको हो । कमलामाईले करातेमा १३ स्वर्ण, ५ रजत र २ कास्य, तेक्वान्दोमा १३ स्वर्ण, २ रजत र २ कास्य, एथलेटिक्समा २ स्वर्ण, भलिबलमा १ स्वर्ण र १ रजत, ब्याडमिन्टनमा १ स्वर्ण र ३ रजत तथा फुटबलमा १ रजत पदक जितेको छ ।
यसैगरी ६ स्वर्ण, ५ रजत र ३ कास्यसहित १४ पदक जितेको तीनपाटन गाउँपालिका दोस्रो भएको छ । तीनपाटनले तेक्वान्दोमा ३ स्वर्ण, ४ रजत र ३ कास्य, भलिबलमा १ स्वर्ण र १ रजत तथा ब्याडमिन्टनमा २ स्वर्ण जितेको हो ।
तेस्रो स्थान हासिल गर्न सफल हरिहरपुगढी गाउँपालिकाले ६ स्वर्ण, ३ रजत र ९ कास्यसहित कूल १८ पदक जितेको छ । हरिहरपुगढीले करातेमा ५ स्वर्ण, ३ रजत र ९ कास्य तथा फुटबलमा १ स्वर्ण पदक हात पारेको हो ।
मरिण गाउँपालिकाले ४ स्वर्ण, १७ रजत र ६ कास्य पदक जितेको छ ।
यसैगरी गोलञ्जोर गाउँपालिकाले २ स्वर्ण, ४ रजत र ११ कास्य, सुनकोशी गाउँपालिकाले १ स्वर्ण २ रजत र १५ कास्य, दुधौली नगरपालिकाले तीन रजत तथा फिक्कल गाउँपालिकाले एक रजत जितेका छन् ।
सिन्धुलीमाडीमा फागुन ५ गतेबाट सुरु भएको खेलकुद महोत्सव आज सम्पन्न भएको हो ।
बागमती प्रदेश खेलकुद विकास परिषद् र सिन्धुली जिल्ला खेलकुद विकास समितिले आयोजना गरेको प्रतियोगिता तथा महोत्सवको समन्वय जिल्ला समन्वय समिति सिन्धुलीले गरेको थियो ।
महोत्सवको समापन समारोहमा आज प्रतिनिधिसभा सदस्य लेखनाथ (राजन) दाहालले विजेता खेलाडी तथा टोलीलाई पदक र पुरस्कार वितरण गर्नुभयो ।
सो क्रममा मन्तव्य राख्नुहुँदै उहाँले जिल्लास्तरीय खेलकुद प्रतियोगितामा विजेता खेलाडीहरुलाई बधाई दिँदै प्रदेश र राष्ट्रियस्तरको प्रतियोगिताका लागि शुभकामना दिनुभयो । उहाँले राष्ट्रिय खेलाडी बनेर अन्तर्राष्ट्रियस्तरको प्रतियोगितामा राष्ट्रको प्रतिनिधित्व गर्ने संकल्पका साथ अघि बढ्न पनि खेलाडीहरुलाई आग्रह गर्नुभयो ।
साथै, प्रतिस्पर्धामा विजयी हासिल गर्न नसकेका खेलाडीहरुलाई पनि निराश नबन्न र अर्को प्रतियोगितामा उत्कृष्ट प्रदर्शनका लागि तयारी गर्न उहाँले आग्रह गर्नुभयो ।
खेलकुदको विकासका लागि बजेट अभाव नदिन आफू लागिपर्ने प्रतिबद्धतासमेत सांसद दाहालले जनाउनुभयो । ‘आगामी वर्ष खेलकुद प्रतियोगिताका लागि बजेट अभाव हुन नदिन तथा थप बजेट विनियोजन गर्न प्रदेश र संघीय सरकारसँग पहल गर्ने प्रतिबद्धता जनाउँछु,’ उहाँले भन्नुभयो ।
सांसद दाहालले राष्ट्रिय खेलाडीहरुको भरणपोषण र सेवा सुविधा व्यवस्था सरकारले गर्नुपर्नेमा जोड दिनुभयो । पछिल्लो समय सरकारले खेलकुद विधालाई प्राथमिकता दिँदै आएको उहाँले बताउनुभयो ।
‘खेल क्षेत्रमा अन्तर्राष्ट्रिय स्तरमा सफलता पाउन खेलकुद विधालाई प्राथमिकतामा राखेर बजेट विनियोजन गर्नैपर्छ । खेलाडीहरुलाई खेलेरै बाँच्न सक्नेगरी अरु पेसा व्यवसायमा लाग्न नपर्ने वातावरण बनाइदियौं भनेमात्र राम्रो नतिजा आउन सक्छ । यो हाम्रो प्राथमिकतामा छ,’ सांसद दाहालले भन्नुभयो ।
