काठमाडौं । राष्ट्रिय युवा परिषदका कार्यकारी उपाध्यक्ष सुरेन्द्र बस्नेतले सूचना प्रविधि सेवा निर्यात गरेर बर्सेनि नेपाली युवाले अर्बौं रकम भित्र्याइरहेको बताउनुभएको छ । उहाँले सूचना प्रविधिको अभूतपूर्व क्रान्तिलाई मुलुकको विकास र समृद्धिमा सदुपयोग गर्नुपर्नेमा जोड दिनुभयो ।
बुढानीलकण्ठ नगरपालिकाअन्तर्गत नगर युवा परिषदद्वारा आयोजित नमुना युवा संसद् अभ्यास कार्यक्रममा उहाँले भन्नुभयो, 'अहिले वार्षिक ६६ हजार युवाले नेपालभित्रै बसेर आईटी सेवा निर्यात गरेर ६७ अर्ब पैसा भित्र्याइरहेका छन् ।' यसको क्षेत्र र सम्भाव्यता विस्तार गर्न तिनै तहका सरकारले सूचना प्रविधिमा विशेष जोड दिन उहाँले आग्रह गर्नुभयो ।
इन्स्टिच्युट फर इन्टिग्रेटेड डेभलपमेन्ट स्टडिज् (आईआईडीएस)को अध्ययन प्रतिवेदनका आधारमा नेपालमै बसेर विदेशीलाई सूचना प्रविधि सेवा निर्यात गरी वार्षिक ६७ अर्ब रुपैयाँभन्दा बढी आम्दानी गरिरहेको उहाँको दाबी छ । सूचना प्रविधि सेवाको प्रचूर सम्भाव्यतालाई मध्यनजर गरी यस क्षेत्रमा राज्यले विशेष प्राथमिकताका साथ सहजिकरण, सरलिकरण र लगानी वृद्धि गर्नुपर्ने उहाँको भनाइ छ ।
कार्यक्रममा बुढानीलकण्ठ नगरपालिकाका मेयर मिठाराम अधिकारीले युवाहरुलाई स्वदेशभित्रै आफ्नो भविष्य खोज्न अपिल गर्नुभयो । उहाँले भन्नुभयो,'नेपाली युवाहरुलाई उद्यमशीलता र स्वरोजगारको अभियानमार्फत आशा र भरोसा जगाउनुपर्दछ । अधिकारीले युवा पङ्तिमा सकारात्मक आशा जागृत गर्नुपर्ने बताउनुभयो ।
तीनदिनसम्म चल्ने नमुना युवा संसदमार्फत् १६ देखि २४ वर्षे उमेर समूहका युवाहरुलाई मुलुकको शासकीय प्रबन्ध, लोकतान्त्रिक मूल्य, योजना निर्माण प्रक्रिया लगायतका बहुआयामिक विषयमा अभ्यास गराइने बुढानीलकण्ठ नगर युवा परिषदका कार्यकारी उपाध्यक्ष रुपेश भट्टराईले जानकारी दिनुभयो ।
