काठमाडौं। नेपाल सरकार अन्तर्गत राष्ट्रिय युवा परिषद्को दसौं स्थापना दिवस आइतबार विविध कार्यक्रमका साथ मनाइएको छ।
वि.स.२०७२ फागुन १९ गते परिषद् गठन भएको दिनलाई स्थापना दिवसको रुपमा मनाउने गरिएको छ।
परिषद्द्वारा आयोजित कार्यक्रममा युवा तथा खेलकुदमन्त्री तेजुलाल चौधरीले युवाको पक्षमा देखिनेगरी काम गर्न आफू क्रियाशील रहेको बताउनुभयो । मन्त्री चौधरीले नेपाली युवालाई मुलुकभित्रै आशा र भरोसा जगाउनुपर्ने बताउनुभयो । उहाँले भन्नुभयो -' युवाको विकास र सशक्तीकरणका लागि राष्ट्रिय युवा नीति अद्यावधिक गर्दै युवा रोजगारी, उद्यमशीलता, क्षमता विकास र नेतृत्व विकासमा जोड दिइरहेका छौं ।'
राष्ट्रिय युवा परिषदका कार्यकारी उपाध्यक्ष सुरेन्द्र बस्नेतले सीमित स्रोत र साधनका वावजुद युवा सशक्तिकरण र उद्यमशीलता विकासमा परिषद लागिरहेको बताउनुभयो । बस्नेतले तिनै तहका सरकारले आवश्यक समन्वय गर्दै युवा लक्षित् कार्यक्रम अघि वढाउनुपर्नेमा जोड दिनुभयो ।
स्थापना दिवसको अवसरमा शुभकामना ब्यक्त गर्दै राष्ट्रिय खेलकुद परिषद्का सदस्य सचिव टंकलाल घिसिङले युवा परिषद् र खेलकुद परिषद्ले युवालाई केन्द्रबिन्दुमा राखेर सहकार्य गर्नुपर्नेमा जोड दिनुभयो।
शुरुवाती चरणमा परिषद् अघि बढाउन गरिएका प्रयासको चर्चा गर्दै परिषद्का पूर्वकार्यकारी उपाध्यक्ष माधव ढुङ्गेलले भन्नुभयो -' युवाका समस्या पहिचान भएका छन्, अब समाधानमा सबै जुट्नुपर्दछ।' ढुङ्गेलले युवाका नीति र संरचना बने पनि अपेक्षाकृत परिणाम हासिल गर्न बाँकी रहेको बताउनुभयो।
कार्यक्रममा परिषद्का पहिलो कार्यकारी उपाध्यक्ष माधव ढुङ्गेललाई अभिनन्दनसमेत गरिएको थियो। सोही अवसरमा कार्यकाल पूरा गरेका सदस्य तथा युवा सञ्जालका अध्यक्षहरुलाई समेत सम्मान गरिएको थियो। दिवसका अवसरमा मन्त्री चौधरी सहितका ब्यक्तित्वहरुले सानोठिमीस्थित परिषद् हाताभित्र वृक्षरोपणसमेत गर्नुभएको थियो।
