नुवाकोट । पञ्चकन्या जनकल्याण युवा समाजले आउँदो चैत ३० गते नुवाकोटको पञ्चकन्या गाउँपालिकास्थित घ्याङस्वाँरामा जिल्लास्तरीय क्रसकन्ट्री दौड प्रतियोगिता गर्ने भएको छ । प्रतियोगिताको यो दोस्रो संस्करण हो ।
युवा समाजको आइतबार बसेको कार्यसमिति बैठकले खुलातर्फ पुरुष र महिला १० किलोमिटर तथा छात्रछात्रातर्फ ५ किमि दौड प्रतियोगिता गर्ने निर्णय गरेको संस्थाका अध्यक्ष टीकाराम तामाङले जानकारी दिनुभयो । उहाँका अनुसार केही दिनमै अनलाइन फाराम खुलाइने छ ।
बैठकले खेल संयोजकमा संस्थाको कोषाध्यक्ष रामहरि भण्डारीलाई चयन गर्ने निर्णय गरेको छ । संयोजक भण्डारीले यस पटक प्रतियोगितालाई स्मार्ट तरिकाले सम्पन्न गर्न तयारी सुरु भइसकेको ग्लोबल मिडियालाई जानकारी दिनुभयो ।
घ्याङ्स्वाँरा सहिद स्मारक पार्कको प्रचारप्रसार तथा जनकल्याण शैक्षिक अक्षय कोष स्थापनाका लागि सहयोगार्थ दौड प्रतियोगिता गरिन लागेको उहाँले बताउनुभयो । यस वर्ष खेलाडी सम्मान,चर्चित कलाकारहरुको बेजोड सांगीतिक प्रस्तुतिसमेत रहने जनाइएको छ ।
पञ्चकन्या गाउँपालिकाको कार्यालय लाकुरीभन्ज्याङबाट सुरू हुने दौड ‘घ्याङस्वाँरा सहिद स्मारक पर्यटकीय पार्क’ पुगी सोही रूट घलेभन्ज्याङ फिर्ता हुने जनाइएको छ । आयोजकका अनुसार खुला दौडतर्फ पुरुष र महिला दुवैका विजेता प्रथमले २२ हजार, दोस्रोले १६ हजार र तेस्रोले १० हजार पाउनेछन् ।
त्यस्तै, ५ किमि दुरीको छात्रछात्रा दौडतर्फ प्रथम हुनेलाई ११ हजार, दोस्रोलाई ७ हजार र तेस्रोलाई ४ हजार रुपैयाँ पुरस्कार प्रदान गरिने जनाइएको छ ।
प्रतियोगितामार्फत गाउँपालिका क्षेत्रमा पर्यटन प्रवर्द्धन हुने र खेलकुदप्रति युवापुस्ताको आकर्षण बढ्ने आयोजकको अपेक्षा छ ।
स्थापनाकालदेखि नै विभिन्न सामाजिक क्रियाकलापमा सक्रिय पञ्चकन्या जनकल्याण युवा समाजले जिल्लास्तरीय दौडलाई आगामी दिनमा प्रदेश, राष्ट्रियस्तरमा लैजाने लक्ष्य लिएको बताएको छ ।
गत वर्ष पञ्चकन्या क्रसकन्ट्री दौड प्रतियोगितामा पञ्चकन्या गाउँपालिका–३ की एलिसा तामाङ र लिखु गाउँपालिका–४ का सुदीप राई च्याम्पियन बन्नुभएको थियो । महिला ११ किलोमिटर दुरी एलिसाले १ घन्टा १३ मिनेट ४१ सेकेन्डमा पूरा गर्दै पहिलो हुनुभएको हो ।
११ किलोमिटरमै पुरुषतर्फ सुदीपले ४७ मिनेट १४ सेकेन्डमा दौड पूरा गर्दै पहिलो हुनुभयो ।
यस्तै पञ्चकन्या पालिकास्तरीय छात्रछात्रा ५ किमी दौडमा पञ्चकन्या वडा १ की सविना राईले ३४ मिनेट १३ सेकेन्डबाट छात्रातर्फ स्वर्ण जित्नुभयो । सोही दुरीमा छात्रतर्फ किरण तामाङ २३ मिनेट १३ सेकेन्डबाट पहिलो हुनुभयो ।
