काठमाडौं । भण्डारी सेवा समाज, नेपाल (रघुवंशी, कौशिक गोत्रीय) संस्थाका आफ्ना सदस्यहरुलाई काठमाडौंको चाबहिलस्थित ॐ हस्पिटल एण्ड रिसर्च सेन्टरले सहुलियतपूर्ण उपचार सेवा प्रदान गर्ने सम्झौतामा आईतबार सम्झौता सम्पन्न भएको छ ।
समाजका सदस्यहरुका निम्ति १५ प्रतिशत र समाजका सदस्यका आफन्तहरुलाई १० प्रतिशत छुट दिनेगरी दुई पक्षीय सम्झौता भएको निवर्तमान महासचिव माधव भण्डारीले जानकारी दिनुभयो । समाजका प्रमुख संरक्षक जिवनकुमार भण्डारी र ॐ हस्पिटल एन्ड रिसर्च सेन्टरका अध्यक्ष डा. आनन्द श्रेष्ठको रोहवरमा सम्झौतापत्रमा संस्थाका तर्फबाट केन्द्रीय अध्यक्ष वीरबहादुर भण्डारी र ॐ हस्पिटलको तर्फबाट प्रमुख कार्यकारी अधिकृत यमबहादुर महतले हस्ताक्षर गर्नुभएको छ ।
त्यस अवसरमा समाजका सल्लाहकार क्षेत्रबहादुर भण्डारी, महासचिव राधाकृष्ण भण्डारी, उपमहासचिव बद्रीकुमार भण्डारी, सचिव रोजकुमार भण्डारी, कोषाध्यक्ष रामहरि भण्डारी, निवर्तमान महासचिव माधव भण्डारी, सामाजिक उत्तरदायित्व विभाग प्रमुख रामकाजी भण्डारी, वरिष्ठ सदस्य थिरबहादुर भण्डारीलगायत र ॐ हस्पिटल एण्ड रिसर्च सेन्टरका वरिष्ठ पदाधिकारीहरु लगायतको उपस्थिति रहेको थियो ।
समाजले यसअघि काठमाडौंको धुम्बाराहीस्थित ह्याम्स अस्पताल प्रालिसँग र सिनामंगलस्थित काठमाडौं मेडिकल कलेजसँग सम्झौता गरेर आफ्ना सदस्यलाई उपचार सेवामा सहुलियत सेवा प्राप्त गरिरहेको जनाएको छ ।
२०६५ असोज ३ गते नेपाल सरकारमा दर्ता भएको समाजले रघुवंशी, कौशिक गोत्रीय दाजुभाइको बसोबास रहेको जिल्ला/पालिकामा संगठन विस्तारको क्रममा रहेको जनाएको छ । प्राकृतिक विपत्ति, स्वास्थ्य समस्यामा र दु:ख/अप्ठ्यारोमा परेका आफ्ना बन्धुहरुलाई सामाजिक उत्तरदायित्व विभागमार्फत विभिन्न सेवा र सहयोग पुर्याउँदै आइरहेको छ ।
