हृदयाघात भएकी महिलाको नर्भिकले गर्याे उद्धार पछि सफल उपचार

स्वास्थ्य-शिक्षा

गृहपृष्ठ
स्वास्थ्य-शिक्षा

हृदयाघात भएकी महिलाको नर्भिकले गर्याे उद्धार पछि सफल उपचार

ग्लोबल संवाददाता बुधबार, जेठ २८, २०८२

काठमाडौं । जनकपुरकी एक ७० वर्षीया महिलालाई हृदयाघात भएको जानकारी आएपछि नर्भिक अस्पतालले हेलिकोप्टरमार्फत् तत्काल उद्धार गरी सफल उपचार गरेको छ।

इमर्जेन्सी विभाग प्रमुख डा. रीजु वैद्यको नेतृत्वमा प्यारामेडिक्सहरु अरविन्दकुमार शाह र दिनेश राईसहितको टोली जनकपुर पुगी महिलालाई आइतबार साँझ अस्पताल ल्याएर उपचार गरिएको हो । छाती दुख्ने र चक्कर आउने समस्या भएपछि ती महिलालाई जनकपुरस्थित जानकी हेल्थ केयरको आइसीयूमा पुर्याएको थियो । टोली जनकपुर पुग्दा महिलामा कम्प्लिट हार्ट ब्लक भएको र मुटुको चाल २५ भन्दा कम भएको अवस्था थियो ।

जनकपुरमा आवश्यक उपचारपछि नर्भिकको टोलीले तत्काल महिलालाई लिएर काठमाडौं उड्ने क्रममा कम्प्लिट हार्ट ब्लक भएपछि टोलीले सीपीआरसहितका आवश्यक उपचार उडान अवधिमै गरेको थियो ।

तत्काल डा. नमिता अधिकारी र डा. रोशन शर्मासहितको टोलीले महिलालाई इन्ट्युबेसन गरेर भेन्टिलेटरमा राखिएको थियो भने त्यसपछि प्रा. डा. यादव भट्ट नेतृत्वको टोलीले अस्थायी पेसमेकर राख्यो । त्यसपछि महिलालाई सीसीयुमा राखेर डा. प्रदीप तिवारी र डा रोमन कार्कीसहितको टिमले उपचार गर्याे ।

बिरामीलाई सोमबार नै भेन्टिलेटरबाट निकाल्नुका साथै पेसमेकर पनि हटाइएको र अवस्था सुधारोन्मुख रहेको अस्पतालले जनाएको छ ।

प्रकाशित मिति: बुधबार, जेठ २८, २०८२ १४:०५

प्रतिक्रिया दिनुहोस्