काठमाडौं । नेपाल सरकारका प्रवक्ता सूचना तथा सञ्चारमन्त्री पृथ्वी सुब्बा गुरुङले मिडिया काउन्सिल विधेयक संचारक्षेत्रकै पक्षमा भएको बताउँदै विरोध गर्नु व्यर्थ भएको बताउनुभएको ।
३१ औं तामाङ भाषा प्रसारण दिवसको अवसरमा आयोजित तामाङ मिडिया अवार्ड २०८२ वितरण समारोहका प्रमुख अतिथि गुरुङले विधेयकमा केही शब्द मात्रै सच्याउँनु पर्ने देखिएको बताउनुभयो ।
हाल प्रतिनिधिसभामा विचाराधीन रहेको र सच्याउनुपर्ने शब्द सञ्चारक्षेत्रको हितको लागि सच्याइने उहाँको भनाई छ ।
अहिले विधेयकको बारेमा विरोध भइरहेको विषयलाई सम्झदै मन्त्री गुरुङले खाका यस भन्दा अघि नेपाली काङ्ग्रेस र नेकपा माओवादी केन्द्रको मन्त्री हुँदा नै तयार भएको भएपनि आफू बाहना बनाएर जिम्मेवारीबाट पछि नहट्ने जानकारी दिनुभयो ।
मन्त्री गुरुङले भन्नुभयो ‘विधेय म आउँनु भन्दा अघिनै दुई मन्त्रीहरू भएको समयमा खाका तयार भएको रैछ साथीहरूलाई मैले ल्याएको जस्तो लागेको छ, त्यसो होइन । जिल्ला प्रशासन कार्यालय पनि सरकारकै निकाय भएको हुँदा विरोध गर्नुपर्ने विषय छैन् , केही शब्द सच्याउँनु पर्ने मैले पनि देखेको छु, त्यसमा थप छलफल हुन बाकी छ ।’
३१ औै प्रसारण दिवसको अवसरमा सम्बोधन गर्नुहुँदै मन्त्री गुरुङले नेपालको सरकारी संचार क्षेत्रमा सबै भाषाभाषीलाई समेट्दै अघि बढेको जानकारी दिनुभयो ।
यस्तै कार्यक्रमका विशेष अतिथि वाग्मती प्रदेशका खानेपानी उर्जा तथा सिँचाइ मन्त्री कृष्ण कुमार तामाङले प्रसारण दिवसको अवसरमा शुभकामना दिनुहुँदै तामाङ पत्रकारलाई सकेको सहयोग गर्ने बताउनुभयो । नेपाल तामाङ घेदुङका अध्यक्ष मोहन गोलेले पछिल्लो समय हरेक क्षेत्रमा जनजाती र तामाङ समुदायमाथि प्रहार भइरहेको बताउँदै यो समयमा तामाङ पत्रकारको सक्रियता जरुरी भएको बताउनुभयो ।
संघका अध्यक्ष नेत्र तामाङको अध्यक्षतामा भएको प्रसारण दिवस तथा अवार्ड वितरण कार्यक्रममा विभिन्न संघ संस्थाका व्यक्तिहरूले शुभकामना प्रदान गर्नुभएको थियो । विद्युतीय सञ्चार माध्यमबाट पहिलो पटक २०५१ भदौ १ गते रेडियो नेपालबाट तामाङ भाषाको समाचार प्रसारण भएको ऐतिहासिक दिनको स्मरणमा प्रत्येक वर्ष भदौ १ गते तामाङ प्रसारण दिवस मनाइन्छ ।
