उम्मेदवारी दर्ता जारी, अध्यक्षमा रावल र उपाध्यक्षमा भुसाल, पौडेलको मनोनयन दर्ता

राज्य-राजनीति

गृहपृष्ठ
राज्य-राजनीति

उम्मेदवारी दर्ता जारी, अध्यक्षमा रावल र उपाध्यक्षमा भुसाल, पौडेलको मनोनयन दर्ता

ग्लोबल संवाददाता सोमबार, मंसिर १३, २०७८

काठमाडौं । नेकपा (एमाले)को दसौं महाधिवेशनअन्तर्गत सोमबार बिहान विभिन्न पदाधिकारी र केन्द्रीय सदस्यका लागि मनोनयन दर्ता चलिरहेको छ । हालसम्म अध्यक्षका लागि भीमबहादुर रावल, उपाध्यक्षमा घनश्याम भूसाल र विष्णुप्रसाद पौडेलको उम्मेदवारी परिसकेको छ ।

रावलको प्रस्तावकमा महादेव बजगाईं र समर्थकमा दूधकला विष्ट रहनुभएको छ । बजगाईं कैलालीको लम्कीचुहा नगरपालिकाका मेयर हुनुहुन्छ भने विष्ट एमाले अछामकी नेता हुनुहुन्छ । बन्दसत्रबाट सर्वसम्मत भन्दै नामावली प्रस्ताव गरिए पनि नेता भूसालले उपाध्यक्षमा उम्मेदवारी दिनुभएको हो ।

त्यस्तै अध्यक्ष केपी शर्मा ओलीको सूचीमा नपरेका निवर्तमान सचिव तथा प्रदेश १ पूर्वमुख्यमन्त्री भीम आचार्यले पनि सचिवमा उम्मेदवारी दर्ता गराउनुभएको छ । त्यस्तै सचिवमा योगेश भट्टराईले पनि उम्मेदवारी दर्ता गराउनुभएको छ ।

अध्यक्ष ओलीले आइतबार मध्यरातसम्म सहमतिको कोसिस गरे पनि लोकतान्त्रिक प्रक्रिया भन्दा बाहिर गएर भएको निर्णयमा आफ्नो असहमति रहने भन्दै रावलले विधि र प्रक्रियाको कुरा उठाएपछि ओलीको सर्वसम्मत बन्ने प्रयासमा धक्का लागेको हो । एमालेको १० औं महाधिवेशनको बन्दसत्रमा सर्वसम्मतिका लागि भन्दै वरिष्ठ उपाध्यक्षमा ईश्वर पोखरेल र महासचिवमा शंकर पोखरेललाई प्रस्ताव गरिएको छ । पार्टीभित्र भीम रावल, घनश्याम भुसाल लगायतका नेताहरूको विरोधकाबीच अध्यक्ष ओलीले दिनभरको होमवर्कपछि प्रस्ताव ल्याउनुभएको हो ।

प्रकाशित मिति: सोमबार, मंसिर १३, २०७८ ०९:५२