कांग्रेस सभापतिका कुनै उम्मेदवारले ५० प्रतिशत मत कटाउन सकेन, आजै दोस्रो चरणको मतदान हुने [अपडेट]

राज्य-राजनीति

गृहपृष्ठ
राज्य-राजनीति

कांग्रेस सभापतिका कुनै उम्मेदवारले ५० प्रतिशत मत कटाउन सकेन, आजै दोस्रो चरणको मतदान हुने [अपडेट]

ग्लोबल संवाददाता मंगलबार, मंसिर २८, २०७८

काठमाडौं । नेपाली कांग्रेसको १४औँ महाधिवेशनअन्तर्गत सभापति पदको मतगणना सकिएको छ । प्रधानमन्त्री शेरबहादुर देउवाले दुई हजार २५८ मत प्राप्त गर्नुभएको छ । उहाँका निकटतम प्रतिद्वन्द्वी डा शेखर कोइरालाले एक हजार ७०२ मत प्राप्त गर्नुभएको छ भने सभापतिका प्रत्यासी प्रकाशमान सिंहले ३७१, विमलेन्द्र निधिले २५० र कल्याण गुरूङले २२ मत प्राप्त गर्नुभएको निर्वाचन समितिले जनाएको छ ।

सोमबार बिहानदेखि रातिसम्म भएको मतदानमा जम्मा चार हजार ७४३ मतदातामध्ये चार हजार ६७९ मतदाताले मतदान गरेका थिए । कांग्रेस विधानअनुसार सभापतिमा निर्वाचित हुन खसेको मतको ५० प्रतिशतभन्दा बढी मत प्राप्त गर्नु अनिवार्य छ ।

पहिलोपटक कुनै पनि उम्मेदवारले ५० प्रतिशतभन्दा बढी मत नल्याएकाले अब पुनः दोस्रो चरणको मतदान आजै हुने भएको छ ।

पुनः मतदान हुँदा बढी मत प्राप्त गर्ने उम्मेदवार विजयी हुनेछ । कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो ।

दोस्रो चरणमा पहिलो र दोस्रो मत ल्याएका देउवा र कोइरालाबीच प्रतस्पर्धा हुनेछ । देउवाले सयभन्दा कम मत ल्याए पुग्नेछ भने कोइरालालाई झन्डै ६ सय मत आवश्यक छ । यसका लागि तेस्रो, चौथो र पाँचौ बन्नुभएका सिंह, निधि र गुरुङका मतदाता निर्णायक हुनेछन् ।

प्रकाशित मिति: मंगलबार, मंसिर २८, २०७८ ०९:१२