प्रजातान्त्रिक समाजवाद भनेको 'जनता ठग्ने बुटी' मात्र : पूर्वप्रधानमन्त्री खनाल

राज्य-राजनीति

गृहपृष्ठ
राज्य-राजनीति

प्रजातान्त्रिक समाजवाद भनेको 'जनता ठग्ने बुटी' मात्र : पूर्वप्रधानमन्त्री खनाल

ग्लोबल संवाददाता शनिबार, पुस ३, २०७८

काठमाडौं । पूर्वप्रधानमन्त्री तथा नेकपा एकिकृत समाजवादीको सर्वोच्च नेता झलनाथ खनालले प्रजातान्त्रिक समाजवाद भनेको जनता ठग्ने बुटी मात्र भएको बताउनु भएको छ । शनिवार माक्र्सवादी ज्ञान केन्द्रले आयोजना गरेको भर्चुअल कार्यक्रममा प्रमुख वक्ताको रुपमा नेता खनालले प्रजातान्त्रिक समाजवाद पुँजीपति वर्गको समाजवाद रहेको बताउनु भएको हो ।

नेता खनालले वास्तविक समाजवाद भनेको बैज्ञानिक समाजवाद रहेको भन्दै श्रमजिवी वर्ग र किसान जनसमुदायको प्रतिष्पर्धाको लागि बैज्ञानिक समाजवादमा जानुको विकल्प नरहेको बताउनुभयो । उहाँले बहुदलीय प्रतिष्पर्धा अर्थात प्रजातान्त्रिक समाजवादको उदय पूँजीपति वर्ग श्रमजीवि वर्गको टकराव र एकाधिकार पूँजीवादको विकाससंगै पूँजीपति वर्ग बीचकै गुटहरुको अन्तरविरोधको कारणले भएको भन्दै यस्तो प्रतिष्पर्धा किसान, श्रमजीवि वर्गको हितमा नहुने विचार व्यक्त गर्नुभयो ।

उहाँले नेपालमा कम्युनिष्टहरुलाई संसदबाट समाजवादी क्रान्तिको आधार तयार पार्ने अवसर मिलेको तर एमाले नेता केपी ओलीले चक्नाचुर पारेको बताउनुभयो । खनालले भन्नु भयो, ‘हामीलाई संसदमा दुईतिहाई बहुमतबाट समाजवादी अर्थनीति ल्याउन र जस्तो सुकै कार्यक्रम ल्याउन सक्ने अवस्था थियो, तर केपी ओली नामको भष्मासुरले चक्नाचुर पारिदियो’ ।
माक्र्सवादी ज्ञान केन्द्रले आयोजना गरेको ‘आजको विकसित परिस्थितिमा नेपाली समाजको वर्ग विश्लेषण कसरी गर्ने’ विषयको डिस्कोर्स कार्यक्रममा नेता खनालले वर्तमान नेपाली समाजमा दलाल पूँजीपति, राष्ट्रिय पूँजीपति, निम्न पूँजीपति, किसान र श्रमजीवि वर्ग गरी पाँचवटा वर्गहरु रहेको विचार व्यक्त गर्नुभयो । उहाँले समाजवादी क्रान्तिमार्फत दलाल पूँजीपति वर्गलाई सत्ताबाट हटाएर निम्न पूँजीपति, किसान र श्रमजीवि वर्गको नेतृत्वमा सत्ता स्थापना गरिने बताउनु भयो ।

कार्यक्रममा माओवादी केन्द्रका युवा नेता तथा लेखक डिपी ढकालले नेपाली समाज र समाजवादी अर्थतन्त्रको बारेमा विषय उठान गर्नु भएको थियो । कार्यक्रम ज्ञानकेन्द्रका अध्यक्ष मनहरी तिमल्सीनाको अध्यक्षता र नमिता न्यौपानेको संचालनमा सम्पन्न भएको थियो ।

प्रकाशित मिति: शनिबार, पुस ३, २०७८ १०:२२

प्रतिक्रिया दिनुहोस्