काठमाडौं । सरकारले उपत्यकाको तीन जिल्लामा कोरोना भाइरसविरुद्धको खोप लगाउने कामलाई तीब्रता दिएको छ। खोप भण्डारण बढ्दै गएपछि सरकारले खोप अभियानलाई पनि विस्तार गरेको हो।
काठमाडौं उपत्यकाका तीन जिल्लामा १८ वर्षमाथिका सबै नागरिकका लागि लक्षित गर्दै विभिन्न २४ वटा खोप केन्द्रमा खोप अभियान थालिएको छ ।
काठमाडौंका ११, ललितपुरका ११ र भक्तपुरका २ गरी २४ खोप केन्द्रमा कोरोना विरुद्धको खोप लगाउन थालिएको स्वास्थ्य तथा जनसंख्या मन्त्रालयले जनाएको छ । यी सबै खोप केन्द्रमा १८ वर्षमाथिका नागरिकले खोप लगाउन पाउने छन्। खोप केन्द्रमा भेरोसेल कोभिसिल्ड र एस्ट्राजेनिका खोप लगाइने छ।
तोकिएको उमेर समूहका काठमाडौंको नागरिकको लागि सशस्त्र प्रहरी बल अस्पताल, बलम्बु, वीरेन्द्र सैनिक बल अस्पताल छाउनी, नेपाल प्रहरी अस्पताल महाराजगञ्ज, शुक्रराज ट्रपिकल तथा सरुवा रोग अस्पताल टेकु, परोपकार प्रसूति तथा स्त्रीरोग अस्पताल थापाथली, सहिद मेमोरियल अस्पताल कंलकी, लोत्से भवन नयाँ बसपार्क, वीर अस्पताल, बयोधा अस्पताल बल्खु, निजामती कर्मचारी अस्पताल र एपेक्स पोलिक्लिनिक जडिबुटीमा खोप लगाउने व्यवस्था गरिएको छ ।
ललितपुरको पाटन अस्पताल, छवा बहाल जनस्वास्थ्य शाखा, सैंबु स्वास्थ्य चौकी, बज्रबाराही चापागाँउ अस्पताल, बाँडेगाँउ प्राथमिक स्वास्थ्य केन्द्र, लेले प्राथमिक स्वास्थ्य केन्द्र, लुभु प्राथमिक स्वास्थ्य केन्द्र, इमाडोल स्वास्थ्य चौकी, चौघरे स्वास्थ्य चौकी र गोटिखेल स्वास्थ्य चौकीमा तोकिएको उमेर समूहको नागरिकको लागि कोरोना विरुद्धको खोपको व्यवस्था गरिएको छ ।
यस्तै भक्तपुरको नेपाल कोरिया मैत्री नगरपालिका अस्पताल थिमीमा बुधबार र शुक्रबार मात्र लगाउने व्यवस्था गरिएको छ भने ख्वप अस्पताल च्यामसिंहमा बिदाको दिन बाहेक प्रत्येक दिन लगाईने छ ।
