काठमाडौं । तामाङ समुदायको साझा संस्था नेपाल घेदुङले माघ शुक्ल प्रतिपदाका दिन मनाउने सोनाम ल्होछार अर्थात् नयाँ वर्ष पर्व बुधबार स्वास्थ्य सुरक्षाका मापदण्ड अपनाइ मनाएको छ ।
सामान्य अवस्थामा टुँडिखेलमा बृहत् कार्यक्रम गर्ने गरेको घेदुङले राष्ट्रिय नाचघरमा सीमित व्यक्तिहरु डाकेर सोनाम ल्होछार मनाएको हो । कार्यक्रममा संस्कृति, पर्यटन तथा नागरिकमन्त्री प्रेम आले, विभिन्न राजनीतिक दलका नेताहरु, कलाकारहरुको सहभागिता थियो । घेदुङ महासचिव बाबु घिसिङले भन्नुभयो, 'ताक/च्यान राष्ट्रिय सोनाम ल्होछार २८५८ सम्पन्न भएको छ । संसारभरी रहनुभएका तामाङ दिदीबहिनी, दाजुभाइ तथा सम्पूर्ण नेपालीहरुमा सुख, शान्ति, प्रगति, समृद्धि र एकताको लागि शुभकामना दिँदै सम्पन्न भएको हो । कार्यक्रममा कोभिड मापदण्डअनुसार आमन्त्रित अतिथि, पत्रकार र कलाकारज्युहरुको मात्र उपस्थिति रहेको थियो ।'
मञ्जुश्री पात्रोअनुसार बुधबारदेखि २८५८ औँ वर्ष सुरु भएको छ । बुधबारदेखि गाई वर्ष पूरा गरी बाघ वर्ष प्रवेश भएको जनाइएको छ । प्रत्येक वर्ष माघ शुक्ल प्रतिपदाका अवसरमा विभिन्न कार्यक्रम गरी सोनाम ल्होछार पर्व मनाइन्छ । मुसा, गाई, बाघ, खरायो, ड्रागन (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होछारलाई विभाजन गरिएको छ ।
ल्होछारका १२ वटै वर्ष पशुपक्षीका नामबाट गणना गरिएकाले प्रकृतिपूजक मानिन्छ । तामाङ जातिको बाहुल्य रहेको वाग्मती प्रदेशका विभिन्न जिल्लामा यो पर्व विशेषरूपमा मनाइन्छ । यस वर्ष सोनाम ल्होछारमा सरकारले देशभर सार्वजनिक बिदा दिएको छ । पहिले यो पर्वका अवसरमा दिने गरिएको बिदा विगतको सरकारले कटौती गरेकामा विरोध भएको थियो ।
