काठमाडौं । स्थानीय तहमा नेकपा माओवादी केन्द्रबाट निर्वाचित जनप्रतिनिधिहरूको दोस्रो दिनको प्रशिक्षण कुमारी हलमा सुरु भएको छ ।
बुधबार अध्यक्ष पुष्पकमल दाहाल प्रचण्डले प्रशिक्षणको उद्घाटन गर्नुभएकाे थियाे । पहिलो दिन प्रचण्डललगायत केही विज्ञहरुले प्रशिक्षण दिनुभएकाे थियाे।
आजको प्रशिक्षणमा स्थानीय सरकार सञ्चालन, सेवा प्रवाह, विकास निर्माण, सुशासन, स्वास्थ्य, शिक्षा, बजेट तथा कानुन निर्माणलगायत विषयमा पार्टीका नेता र विज्ञहरूले प्रशिक्षण दिने कार्यक्रम छ ।
बिहीबारकाे प्रशिक्षणमा अघिल्लो कार्यकालमा उत्कृष्ट काम गरेका केही स्थानीय तहका प्रमुखहरूले अनुभव सुनाउने कार्यक्रम पनि राखिएको छ ।
प्रशिक्षणमा देशभरका गाउँपालिकाका अध्यक्ष, उपाध्यक्ष, नगरपालिकाका प्रमुख, उपप्रमुख र केही स्वन्तत्र निर्वाचित गरी २६० जनप्रतिनिधि र पार्टीका शीर्ष नेता एवं पूर्वस्थायी समिति सदस्य सहभागी हुनुहुन्छ ।
आज अर्थमन्त्री जनार्दन शर्माले सरकारको नीति तथा कार्यक्रम र बजेट, राष्ट्रिय योजना आयोगका सदस्य रामकुमार फुयाँलले स्थानीय तहको नीति, योजना र कार्यक्रम, पार्टीको श्रम, अर्थ तथा योजना विभागका प्रमुख वर्षमान पुनले स्थानीय अर्थतन्त्रको निर्माण र नेपाली विशेषताको समाजवाद, चार्टर्ड एकाउन्टेन्ट चन्द्रकान्त भण्डारीले स्थानीय तहको लेखा प्रणालीबारे प्रशिक्षण दिने कार्यक्रम छ।
स्थानीय तहको बजेट निर्माण विषयमा राष्ट्रिय योजना आयोगका पूर्वउपाध्यक्ष डा. मीनबहादुर श्रेष्ठ, स्थानीय तहको विद्यालय शिक्षण सिकाइ विषयमा सुलभ बुढाथोकी, स्थानीय तहमा विज्ञान प्रविधिको प्रयोग विषयमा पार्टीको विज्ञान तथा प्रविधि विभागका प्रमुख एवं पूर्वमन्त्री गणेश साह, स्थानीय तहमा सूचना प्रविधि विषयमा डा. शैलेन्द्र गिरी र स्थानीय तहमा वन, वातावरण र विपद् व्यवस्थापन सम्बन्धमा पूर्वमन्त्री शक्तिबहादुर बस्नेतले प्रशिक्षण दिनुहुनेछ छ ।