ललितपुर । जलस्रोत तथा सिँचाइमन्त्री पम्फा भुसालले स्थानीय पहिचान संरक्षण र संवद्र्धन गर्दै जनताको सेवामा लाग्न नवनिर्वाचित जनप्रतिनिधिलाई आग्रह गर्नुभएको छ । ललितपुरको महालक्ष्मी नगरपालिका वडा नं ६ बाट नवनिर्वाचित स्थानीय जनप्रतिनिधिलाई बधाई तथा शुभकामना दिन आज आयोजित कार्यक्रममा उहाँले भन्नुभयो, “जनप्रतिनिधि शासक होइनन्, सेवक हुन्, जनताको आधारभूत आवश्यकता पूरा गर्न कर्तब्यनिष्ट हुनुहोला ।”
आफ्नो कला, संस्कृति र पहिचानलाई संरक्षणलाई विशेष ध्यान दिएर मात्र आधुनिक विकासमा अगाडि बढ्न सुझाव दिँदै मन्त्री भुसालले भन्नुभयो, “परम्परागत पहिचानलाई संवद्र्धन गरेर विकासका गतिविधि अगाडि बढाउनुपर्छ ।” उहाँले महालक्ष्मी नगरको आर्थिक विकासको आर्थिक विकासको आधार पर्यटन भएकाले त्यसका लागि वडादेखि नगरसम्म उपयुक्त कार्यक्रम बनाएर कार्यान्वयन गर्नुपर्नेमा जोड दिनुभयो ।
स्वास्थ्य, शिक्षाजस्ता आधारभूत विषयलाई जनप्रतिनिधिले ध्यान दिनुपर्ने बताउँदै मन्त्री भुसालले भन्नुभयो, “सार्वजनिक विद्यालयको शिक्षालाई गुणस्तरीय बनाउनुपर्छ, सुलव स्वास्थ्य उपलब्ध गराउनुपर्छ । आफ्नो कार्यकाललाई जनता सेवा गर्ने अवसरका रुपमा प्रयोग गर्नुपर्छ ।”
कार्यक्रममा भूमी व्यवस्था, सहकारी तथा गरिवी निवारणमन्त्री शशी श्रेष्ठले स्थानीय जनप्रनिधिलिे जनताका आवश्यकतालाई पूर्ति गर्दै विकासका कार्यक्रम अगाडि बढाउन सल्लाह दिनुभयो । उहाँले आफूले मन्त्रालय सम्हालेपछि भूमीका विषयमा रहीआएका समस्या सम्बोधन गरेको उल्लेख गर्दै भन्नुभयो, “३०० स्थानीय तहका जनतालाई जग्गाधनी पूर्जा वितरण गर्ने योजना बनाएको छु ।”
जनता समाजवादी पार्टीका नेता नवराज सुवेदीले नवनिर्वाचित सदस्यले जनताको आवश्यकतालाई पहिचान गरेर आफ्ना कार्यक्रमम कार्यान्वयन गर्नुपर्ने बताउनुभयो । नवनिर्वाचित वडा अध्यक्ष धर्म महर्जनले आफूलाई जनताले अमूल्य मत दिएर निर्वाचित गराउनुभएकोप्रति धन्यवाद व्यक्त गर्दै जनताका आवश्यकतालाई पूरा गर्न आफू निरन्तर लाग्ने विश्वास दिलाउनुभयो ।
