काठमाडौं । प्रदीप भट्टराई अहिलेका सफल निर्देशकको सूचीमा अग्रपंक्तिमा पर्नुहुन्छ । डेढ दशक अगाडि मह सञ्चारमार्फत रजतपटमा प्रवेश रेका प्रदीपले डेब्यु चलचित्र जात्रा, शत्रु गते र जात्रै जात्रामार्फत आफ्नो निर्देशकीय क्षमता प्रस्ट्याइसक्नुभएको छ ।
आफू सुहाउँदो वा आफूले न्याय गर्न नसक्ने स्क्रिप्ट छाड्ने गरेको उहाँ बताउँनुहुन्छ । यिनै प्रदीप पछिल्लो समय रियालिटी शो कमेडी च्याम्पियनमा निर्णायक हुनुह्नछ । पहिलो सिजनमा निर्णायक रहेका उहाँले दोस्रो सिजनमा पनि निरन्तरता दिनुभयो ।
तर, निर्णायक बन्ने निर्णय लिन उहाँलाई सहज भने थिएन । चलचित्रको अफर आइरहेका प्रदीपले ठूलो पर्दा नभई सानो पर्दा रोज्नुभयो । आखिर प्रदीपले चलचित्र छाडेर किन रियालिटी शो रोज्नुभयो त ? यो प्रश्न धेरैको मनमा हुन सक्छ । यसको सामना उहाँले पनि धेरैपटक गर्नुभएको छ ।
केहीले त उहाँलाई चलचित्र निर्माताहरुलाई ‘नो’ भन्नुपर्ने बाध्यता भएपछि प्रत्येक साता सानो पर्दा आउनुपर्ने सोच बानाएको पनि भन्ने गर्नुभएको छ । यद्यपि प्रदीप यसलाई स्वीकार्नु हुन्न । उहाँले शो छनोट गर्नुको कारण नै ‘प्रतिभा’ लाई अगाडि ल्याउने मौका नगुमाएको बताउँनुहुन्छ । शो अफर भएर निर्णायक बन्ने निर्णय लिन उहाँलाई प्रेरित गर्ने तथ्य नै ‘नवप्रतिभा’ बन्यो ।
‘हामीलाई चाहिने मान्छे, हामी नै खोज्न सक्छौं भने त्यो मौका किन गुमाउनु ?’ प्रदीपले प्रतिप्रश्न गर्दै भन्नुभयो, ‘म कमेडी जनरामा काम गरिरहेको निर्देशक भएकाले पनि त्यही क्षेत्रलाई चाहिने प्रतिभा खोज्न अगाडि आएको हुँ ।’ आफै कन्भिन्स भएपछि शो गर्ने निर्णयमा पुगेको उहाँ बताउनुहुन्छ ।
कमेडी क्षेत्रलाई कमेडी च्याम्पियन दिने शोमा प्रदीपले आफ्नो चलचित्रका लागि कलाकार पाउनुहोला त ? भन्ने प्रश्नमा उहाँ भन्नुहुन्छ, ‘कसले कति काम गर्न सक्छ भन्ने पनि शोमा रहेर नजिकबाट बुझ्न पाउँछौँ ।’ उहाँले एउटा प्रतिभा कमेडी च्याम्पियन बन्दै गरेको देख्दा आफ्नो कथामा फिट हुने पात्र देख्न पाउने बताउनुभयो । ‘मेरो कथामा सुहाउने च्याम्पियन मात्र होइन, मञ्चमा आउने जोकोही हुन सक्नु हुन्छ,’ उहाँले भन्नुभयो, ‘साथै काम पनि गर्नेछौँ, नगर्ने भन्ने नै छैन ।’ यद्यपि उहाँले कमेडी च्याम्पियनमा देखिने कमेडियन पनि अन्य झैँ सेलेक्सन हुने बताउनुभयो । उहाँले भन्नुभयो, ‘कमेडी च्याम्पियनमा रहेको भनेर होइन कि पात्र सुहाउँदो हुँदा काम गर्ने नै हो ।’
यसरी जोडिनुभयो कमेडी च्याम्पियनमा
प्रदीपले लगातार तीनवटा चलचित्र बक्स अफिसमा हिट दिनुभएपछि फिल्मकर्मीसँगको भेटघाट बाक्लो नै थियो । जात्रैजात्राको प्रशंसा बटुलिरहेको समयमा उहाँलाई एक दिन विशाल भण्डारीले भेट्ने आग्रह गर्नुभयो । फिल्मकर्मी भएकाले भेट्ने समय तय भएर भेटघाट पनि भयो । त्यही भेटमा प्रदीपलाई कमेडी च्याम्पियन अफर भयो । उहाँले आफूलाई रियालिटी शोमा निर्णायक बन्ने अफर आउला भन्ने सोच्नुभएको थिएन । ‘विशालजीको रिसर्चले केही इम्प्रेस भए पनि मैले डिसिजन दिन सकिनँ र फर्किएँ,’ प्रदीपले भन्नुभयो । शोमा सबैभन्दा पछि छानिएका निर्णायक हुनुहुन्छ उहाँ । मोडर्न कमेडी बुझ्ने र आफै कन्टेन्ट राइटर भएका कारण आएको अफर उहाँले केही साथीभाइमाझ सुनाउनुभयो । ‘फ्रेन्चाइज भएको भए क्वालिटी राम्रो हुन्थ्यो, तर आफ्नै छ गाह्रो होला’ धेरैले यस्तै भनेका थिए प्रदीपलाई ।
यद्यपि विशालकै आग्रहमा उहाँ पुनः भेट्न जानुभयो । अनि उहाँले आफ्ना जिज्ञासा राख्नुभयो । उहाँले सेटभन्दा पनि कन्टेन्ट क्रिएटरको बारेमा बुझ्नुभयो । ‘कन्टेन्ट राइटरको टिम राम्रो पाएपछि म शो गर्न सहमत भएँ र उहाँलाई पनि आफूले बुझेको जानकारी राख्नुभयो,’ प्रदीप भन्नुहुन्छ, ‘सायद त्यो टाइममा मैले बढी अड्काए कि जस्तो पनि लागेको थियो, तर मेरो कुराले उहाँहरु बढी सिरियस हुनुभएको भन्ने पनि लाग्छ ।’ उहाँले शो गर्ने सहमति दिँदासम्म अन्य सम्पूर्ण निर्णायकहरु अनुबन्ध भइसक्नुभएको थियो ।
